كلمات ابو الحجاج الشاعر
قلبي عليكى يا امه حزين
لولا الملامه ل احط فوق دماغى طين
واجيب ولايه تنوح عليكى
واجيب كمان معددين
بتقولي ليه خبر ايه الحكايه
وقعتنا طين
لما ولادك سرقوا ولادك
مش م النهارده ده من سنين
……………………..……………………..……..
سرقوا ونهبوا وفرقوا
اكلوا وشبعوا وظبطوا
واما صرختى وقولتى ولادى
سمعوكى بس استعبطوا
……………………..……………………..……
واما انتفضنا وجالنا عيد
وقولنا ثوره وتاريخ مجيد
وفالميدان شوفتى ولادك
ضحى بدمه كام شهيد.
وقولنا نبنى علشان خواتى
بيت جديد
……………………..……………………..…
اصل القديم ده ماكنش ينفع
ده كان عوين مبنى بطين
وطينه وسخه من حته نجسه
السوسه نخرتها من سنين
……………………..……………………..…..
هانبنى يامه بيت بالمسلح
هانأسسه قبل مانرفع
تكلفته عاليه والجيب مافيش
و الجوع ب يوجع
لكنى يا امايا ماتخافيش
الهمة عاليه ولدك هايدفع
……………………..……………………..…….
وف ليله غبره نومت وصحيت
ياريتنى يا امه ماتولدت ولا كن جيت
لقيت خواتى اللى عاشانهم بحرق ف دمى
بيسرقوا حديد البيت
غطينى يا امه و صوتى
ما انا خلاص اتغميت
……………………..……………………..………
بصى اما اقولك انتى السبب
ومالبدايه للنهاية عليكى العتب
وبطنك القلابه ورتنا طبابيب العجب
ولده زينه و ولده شينه
وولدة ورتنا النجوم
ف عز النيران وعز اللهب
قالوا زمان الناس معادن
وعلمونا ازاى نفرق
بين المعادن فالكتب
ونستى ياامه تعلمينا
الفرق ايه بين القزاز والالماظ
والفرق ايه بين النحاس وبين الدهب
وماتزعليش يا امايا منى
لو كنت قليت الادب
مخنوق ودمى بيتحرق
عملت طباطيب العجب
……………………..……………………..……………….
بصى اما اقولك والله يا مه
لا ارجعك تانى صبيه
واخلى كل الكون يقول
شوفوا بهيه
……………………..……………………..…….
وهبت دمى يا امه فداكى
لو حد فالدنيا عداكى
والضلمه مهما تطول
هاننور سماكى
